Über uns - Monnem Blueliners

Hajo, do simmer! Seit 2016 gibt's uns, die Monnem Blueliners: en Haufe Bloomäuler un Zugezoogene, die eens gemeinsam hänn. Mer kenne ohne Eishockey net lewe. Gut, theoretisch schun. Awwer wozu?

Unsern Name hämmer net vun ungefähr. Die blaue Linie is fer uns heilisch, un mer sin die Einzische, die do nie im Abseits stehe. Unser Herz schlägt blau-weiß-rot fer die Adler Mannheim. Ob dehääm in de SAP Arena oder auswärts irgendwo in Europa, mer fahre hinnerher. Unsere Ausrede beim Chef sin mittlerweile so kreativ, die kännt mer als Roman rausbringe.

Awwer mer gugge net nur noch owwe. Mer unnerstütze aach de lokale Eishockeysport, vom Nachwuchs, der noch mehr an de Bande hängt als uffm Eis steht, bis zu de Hobbymannschafte, die mehr schwitze als treffe.

Als Teil vun de AFCA sin mer bestens vernetzt, un unsere Fanfreundschafte pflege mer wie annere ihr Schrebergärtle: mit de Härdschde, BullyTor82, de Hockey Rebels, de Net(z)adler, de Meisterjäger un Meisterträumer. Un mit all dene, die mer grad vergesse hänn. Ihr wisst, dass mer eich liewe, gell? Mit unsere Freunde werd gfeiert, gsunge un ab un zu aach gemeinsam gelitte. Letzteres meistens nach em Penaltyschieße.

Du willscht aach debei sei? Dann allee hopp: Werd Mitglied bei de Monnem Blueliners! Mer suche Leit mit Stimm, Herz un Sitzfleisch fer lange Auswärtsfahrte. Vorkenntnisse? Brauchscht kä. Ä Trikot langt. Un gute Nerve.

Uffbasse: Mer sin laut, awwer herzlich!